8 феврали соли 2025 бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон маъракаи ниҳолшинонӣ дар Резервати биосферии Ромит баргузор гардид. Ҳадафи ин иқдом пешгирии таназзулёбӣ, нигоҳдории мувозинати экологии экосистемаҳои табиӣ ва барқарорсозии ҳолати табиии ҷангалзорҳо мебошад.
Дар чорабинӣ Муовини сарвазири Ҷумҳурии Тоҷикистон муҳтарам Зиёзода С.Р., Раиси Кумитаи ҳифзи муҳити зисти назди Ҳукумати Ҷумҳурии Тоҷикистон муҳтарам Шерализода Б.А., роҳбарони вазорату идораҳо ва дигар сардорони зерсохторҳои Кумитаи ҳифзи муҳити зист иштирок намуданд. Дар доираи маъракаи мазкур зиёда аз 1200 бех ниҳоли дарахтони ороишӣ, сояафкан ва мевадиҳанда шинонида шуд.
Маъракаи мазкур ҳамчун иқдоми муҳими экологӣ барои беҳтарсозии муҳити зист ва рушди устувори экосистемаҳо арзёбӣ мегардад. Ташкилкунандагон ва иштирокчиён таъкид намуданд, ки чунин чорабиниҳо дар оянда низ идома хоҳанд ёфт, то табиати кишвар ҳифз ва муҳити солим барои наслҳои оянда таъмин гардад.
